...تا كس ـــي

المكان: أريانة وقت الذروة المسائيّة

مهمّة شبه مستحيلة باش نلقى تاكسي تخلّطني للموعد متاعي 

بعد دقائق م الاستنباط و العينين يولّيو صحفة باش تلقط أي تاكسي متعدية، تاكسي تاقف، نخطفها خطفان

ـ السلام عليكم

ـ و عليكم السلام ولدي... سامحني ولدي راني باش نتعدّى للجامع باش نصلّي المغرب

الله لا يجعلنا جرّة هاو الراجل التقوى عاملة فيه يحب يصلّي حاضر في الجامع

ـ نهبط معناها ؟؟

ما يجاوبنيش حال إلي يحب يخدم كورسة و ينكّس 

ـ وين ماشي انتي ولدي ؟؟

ـ المنار

ـ باهي تو نولّي نصلي غادي

مازال يحكي آودي آ 4 تشد فران قدّامنا التاكسيست يضرب الفران إلي ماهوش طايب جملة توقف التاكسي بالسيف و يعطيها سؤال انكاري عالمي السائق:

ـ تفرّج ها الميبون شادد على زبّي فران !! نهبط انّيكلو أمو توا !!!؟؟؟

هو لا محالة التاكسيست في السياقة بهيم ياسر و زيد كرهبتو حالها يشكي للتعالى أما إلي شدني كيفاش راجل في كبر السيد (فوق الـ50 عام) و صلاة و تقوى و يعطيها جملة تضهّرلك مستوى لا باس بيه من إجادة للغات الحيّة

تقريبا خلطنا وين حاجتي و زوز بنات (بون بين 29 و 35 في العمر) واقفين على طرف الكياس.. يتحفنا "عمي الشيفور" مرّة اخرى:

ـ تفرّج هاك الزعكة !!! قحاب متاع زبي !! يعرفو البلاصة هاذي بكلّها ليبيّة يجيو يطلّفحو في الكياسات... سامحني ولدي ناخذو الدورة و نهبّطك ما نحبّش نركّبهم ها الشلايك

ـ خوذ راحتك يا بابا !!

ـ يعز مقدارك ولدي ايا ربي معاك خ نخلط ع المغرب هاو ديجا أذّن

هبطت م التاكسي و قعدت نستحضر في آية ياما تكعررت على مسامعي كيف كنت في الابتدائي: إن الصلاة تنهى عن الفحشاء و المنكر ولذكر الله أكبر

أما على ما فهمت التاكسيست إلي طلعت معاه عِرفو وقف في: إن الصلاة كانت على المؤمنين كتابا موقوتا

و بما أنّو الايمان مسألة عقائديّة بين العبد و خالقو و انا ما نجّمش نحكم على إيمان الناس ما انجّم نقول كان:

... نحن نتولى الظواهر والله يتولى السرائر

       أريانة في 6 أكتوبر 2012